Albert einstein “مز ا حیہ مسخا کہ”

Albert einstein jesi tareekhi shakhsiyat ko kon nahi janta.bus aik kon nikamma hai jisey nahi maloom baqi tou sab log jantay hain.kon ko shuru say hi taleem mai koi dilchaspi nahi thi,iska baap alag sharabi kababi,maa kisi darzi kay saath bhaag gaye thi.kon ho hazar martaba samjhaya kay bhai kuch parh likh lay magar majal hai jo is nigorh maray kay kaan par zara koi juoon raingi ho.khair hamain kia lena daina kon say,janam jala khud hi bhugtay ga.hamara aaj ka asal mouzu tou einstein hai.is say pehlay mai albert einstein kay lazawal sciencey karnamoon kay baray mai aap ko kuch bataon yeh baat janna bohat zaroori hai albert einstein ba haiseeyat insaan kesa tha?

Einstein nay 14 march kay din Germany mai rihayeesh pazeer aik yahoodi ghar mai ankh kholi,chunacha qaeedai ki ru say woh bhi bila jhijhak aik yahoodi hi tha,jun jun woh yahoodi qoum kay azayeem janta gaya us ki ankhain mazeed khulti gayen.yahan tak kay aik waqt aesa bhi aaya jab us ki ankhain hairat say phail gayen.Albert einstein mai bachpan say hi woh sari kameengi moujood thi jo aaj kal kay musalmaan,esayee or hindu sunn kar touba touba kartay hain or kano ko haath lagatay hain.yani dheemay or shireen lehjay mai guftugu karna,aala darjay ka ikhlaaq,rakh rakhaoo or tehzeeb o tamadun kay daeeray mai reh kar apnay kaam say kaam rakhna.einstein kay saath bachpan mai aik ajeeb o ghareeb technical moujza yeh hua kay jesay jesay us ki umer barhna shuru hue tou uskay qad mai izafa honay laga.ishi anokhay mushaheedai ko lai kar baad mai einstein nay “nazariya e izafat” ka kulya daryaft kia.chunkay einstein europe jesay thanday ilaqay mai paida hua tha is liye mizaaj ka bohat garam tha.yeh iska ghussa hi tha jis ki waja say iskay baal har waqt sindh ki ujhrhi fasloon ki tarnha jharh jhankarh dikhaye detay.sunn nay mai tou yeh bhi aaya hai kay albert einstein tasweer utar wanay say pehlay maqnatees kay zariye apnay baal bigarh leta takkay woh aik manjha hua physicist lagay.Aam insaan albert einstein kay zaheen or shatir dimagh ka andaza is baat say laga sakta hai kay usnay switzerland mai Maric naami aurat say shadi ki takay honeymoon kay liye kahin dur na jana parhay or sasta tikaoo kaam hojaye.isay kehtay hain aik ticket mai do mazay.mazeed kanjoosi ka yeh aalam tha kay einstein nay isay talaq bhi 14 feb jesay romantic mouqay par di.jis say isnay gulaab kay phool par aanay wala kharcha bacha lia albatta talaq kay kaghzaat par bhari raqam ka bojh bardhasht karna parha.Albert einstein bohat ziada paidal chalta tha jis ki waja woh yeh batata tha kay woh hukoomat ko maqool tax [mehsool] adaa karta hai jis say woh sarhkain banati hai. ab agar mai paidal na chalon ga tou kesay apnay tax ka faida uthaoon ga.woh aksar apnay zaati faiday kay liye amreeka ka rukh kia karta tha shayad woh bhi la shaoori towr pay thora thora pakistani siyasaat dano say muta’seer tha.yeh bhi mumkin hai einstein nay mustaqbil mai amreeka ki ijaardari or fouji ehmiyat ka andaza pehlay hi laga lia ho jo us waqt khud amreekiyoon ko bhi nahi pata thi.

Einstein nay jab photo electric effect pay tehqeeqi mukaalma qalam band kia tou iski naqool sari duniya mai mouatt’abar physicsts ko bhaijeen.inhi mai aik gujranwala university kay professor Dr khursheed memon electron wala bhi shamil thay.Prof khursheed memon pehlay hi student union ki harhtaloon say pareshan,shadeed iztairab or koft ka shikar thay kay upper say einstein ki daak mousool hogaye.Prof sahab ko yeh tehqeeq (photo electric effect) kuk vi samajh na lagi.kafi ghoor o fikr kay baad jab kuch sujhayee na dia tou mousoof nay Albert einstein ko jawabi khat likha “miyaan hum pehlay hi newton ka kashish e saqal qanoon samjhnay say qaseer hain or tum ho kay mazeed owl fowl bak rahay ho,jao miyaan kahin or jakar apna manjhan baicho,hamaray dimagh ki MC BC mat karo ! faqat tumhara mukhlis Prof khursheed memon electron wala”.Albert einstein ko jab yeh qarara jawab mila tou urdu zuban say na ashnayee ki waja say baqi batien tou pallay na parhi magar yeh MC BC uskay dimagh mai ghoomnay laga.kehtay hain insaan kay la shaoor mai khutaknay wali baat sapnay mai shakal badal kar nazar aati hai bus us hi raat einstein pay E=MC^2 ki masawat khawab mai ashkar hogaye.yun gujranwala university kay Prof Dr khursheed memon ki madad say sciencey duniya ko mada or tawanayee kay darmiyaan aik atoot bandhan mil gaya.tau’joob wali baat yeh hai kay einstein nihayat kam zarf aadam zaat nikla.usnay kabhi bhi Prof sahab ko is baat ka zara sa bhi credit nahi dia.ishi dard mandi ko laikar lahore kay puranay darwazay par president supreme court bar association Asma jhangir sahiba nay ehtejaj buland kia or kuch obash larko nay Prof sahab say yakjheti kay towr pay road par jalao gherao or cheena jhapti ki.einstein sirf aik acha science daan hi nahi balkay bohat umda paye ka tehreer nigaar bhi tha.ishi khoobi ki bunyad par kayen saray dost ehbab is say university assignmets ki khush khati karwanay aatay thay.is ki ziada tar copiyoon kay akhri oraaq signatures ki mashq say bharay parhay thay,jo is baat ka saboot hain kay einstein dhun ka bai inteha pakka tha.jis kaam kay peechay parh jaye ussay mukammal kar kay hi sans lehta tha.

aik dafa California Institute of Technology nay albert einstein ko scientific tehqeeq pay aiyzazi lecture deliver karnay ki dawat di.wesay tou mosoof mardana sinf rakhtay thay or kisi bhi tarnha delivery kay qabil nahi thay magar musharraf ki tarnha char paisoon ki khatir lecture dainay kay aesay bhookay niklay kay fata fat haan kardi.einstein ko is mouqay kay liye khud pay bai panha eitmaad tha kiun kay noween jama’t kay liye sindhi kay imtehaan mai bhi us nay “science jo karishmo” par mazmoon likha tha.ab jab eintstien sahab institute pouhnchay tou kia dekhtay hain pura lecture hall honahaar talib e ilmo say khacha khach bhara parha hai.ilm o justuju ki matlaashi ankhain unki taraf dekh rahi hain.chancellor sahab nay einstein say khusoosi arz ki kay science or technology pay aesi gheri baat ki jaye jo nujawan talib e ilm mai soch o fikr ki naye rahain muta’aeeyun karay.einstein sahab podium pay tashreef laye.aik lamhay kay liye samnay wali deewar ka jaiza lai kar lambi si saans li.phir usnay yeh tareekhi jumla ada kia “aray o kambakhtoon yeh bijli kay board mai ziada ungal nahi kia karo,kisi din current wurrent lag gaya na tou chacha bhi nahi bacha paye ga tum logoon ko”… bus itna sunna tha kay sara hall ghussay say bai haal hogaya.anday,teematar or jootay uski taraf lapkay jissay einstein nay talib e ilmo ki garamjoshi qarar dia.qareeb hi moujood aik pukhta umer professor nay einstein ko haath kay isharay say pass bulaya,uski peeth thap thapa kar “bum” pay do thudday raseed kiye.wapsi kay kiye rickshaw ka kiraya dai kar ussay wahan say chalta kia.sarapa haif yeh hai kay us din einstein ka facebook status kuch istarnha tha “just had the great session with students at california institute on modern theory of relativity”.jis par hamaray science daan pervez hoodbhoy nay comment mara “wah saien wah time dilation theo weo,moving clock runs slow weo”.is status par hamesha ki farigh ghazala4u or hot chilli bisma ki likness [pasandeedgi] bhi aayen jin ka dur dur tak science say koi wasta na tha.khair jo kuch bhi hai albert enistien ka naam tareekh mai sunheri huroof say likha jaye ga.ishi ratay rataaye formula qism kay jumlay kay saath yeh mizahya tehreeri maskhaka bhi khatam shud.

Author : Zubair Siddiq

choro jana yeh mentions baad mai dekh lena

choro jana yeh mentions baad mai dekh lena
zeest ki ghema ghemi mai
barhi muddat kay baad
furhsat ka yeh lamha ma-yai-sar aaya hai

mai or tum
aik adad coffee ka mug thamay
dair tak
idher udher ki baatain kartay hain
dil say hansay bhi bohat arsa’ hua
tumharay mizahya jumloo.n ki chaashni
ankhoo.n mai falsafay ki jalti qindeelain
bai rukhi kay saath mohabbat ki amaizish
kis qadar taras gaye hai meri rooh
in sab bhooli bisri adatoo.n kay liye

ab tumhari tawajjo ka markaz
kuch albelay sanam khanay hain
meri naye poshaak bhi
dil lubhayee ka samaa’n nahi karti
meri ana’oo.n kay bout
kab kay paash paash kar diye tum nay

na janay kab hamaray darmiyaan
yeh khaleej bharti chalay gayee
mai apni zaat kay mehwar mai kuch ulajh si ga-ee
tum twitter ki tilismi waadiyoon mai kuch behl say ga-yai

aksar bethay bethay ab muskura daitay ho
kabhi iztairaab ki si kafiyat taa’ri hoti hai
akhir yeh kesay majazi rafeeq hain
jin ki qurbat mujh say bhi ziada azeez hai tumhay

dosroo.n ki tasaweer mai yeh wajd
kiun kar paida hua
ghairoo.n ki batoo.n mai
lams say bhi ziada lazzat akhir kahan say aayee

ajab tamasha e bazm laga hai yahan
miskotoo.n ki rangeeniyaan
rah guzr ki tabdeliyaan
akhbaar ki surkhiyaan

pehlay bhi tou aqal ko kheera’n karnay wali batien
socha kartay thay tum
magar woh baaz-gasht
dil kay kisi goshay mai hi reh jati thi

aaj yun bhi din aaye hain
koi anokhi baat
jo qalb par eyaan ho jaye
tweet karay baghair nahi reh saktay tum

lafzoo.n ka yeh chaska kuch achota sa hai
zaviyoo.n kay nit naye pairahaan
ehsas e bartari ki laghzeehai
kirchi kirchi kaanch jesay
thotay phootay insaan
gulabi jarhay say jazbaat
nadamat bhari ankhain
bai huda chutkalay
chaak girainbaan
zameer ki adalat
qehqa
or
ilzaam

raweeyoo.n ki roshni nay har taraf say
yun khalqat ko aa ghera hai
apni khaslat chor kar
dosroo.n ki jablat par chaltay hain hum

bila wajah kisi adam zaat par
yeh fuzool ka rashk karna
oroon ka pakwaan dekh kar
apnay dastarkhuwaan say narazgi

albatta yeh kehnay mai koi harj nahi
zindagi kay kuch dilchasp pehlu
apnayain hain tumnay

mamulee cheezoo.n ki bhi
pazeeraye kartay ho
daad denay ka dhang bhi
khoob seekha hai tumnay

tumhari afsaanwee guftugu
meray kaanoo.n mai ras gholti hai
tumhari hazir dimaghi
lajawab si hogaye hai

Poet : Zubair Siddiq

KHALU KI DUKAAN OR ASLI PARI KA DHAAGA [an inorganic love story]

yeh kahani nawway [90s] ki dihayee mai karachi kay aik pasmanda ilaaqay korangi sou quarter kay gird ghoomti hai.qabal iskay kahani kay jazbati pehlu ko ujagar kia jaye mai zara sa sou quarter ka tafseeli manzar nama paish kardun.korangi sou quarter sufaid posh tabkay ka har dilaziz qasba gardana jata hai.mukhtaleef auqaat mai chabri waloon ki awazain fizza mai goonjti hain.yahan aurtain baramdi darwazoon mai tangi aik dosray say miskotoon mai magan dekhaye dewain.gharoon ko taqsseem karnay wali deewar kay beecham beech aik khirki ka tasawwur qaim hai.jiskay zariye parhosi aik dosray say daal salan ka tabadla kartay hain.yun parhosiyoon kay darmiyaan aqeedat or mohabbat ka nadir rishta barqaraar rehta hai.VCR pay lagnay wali film ki khushbu puray muhallay mai gardish e amal ka paish khaima sabit hojaye tou bachay joq dar joq us baithak mai dakhil hojatay hain jahan say kisi filmi manzar ki soot arahi.phir yeh ghar aan ki aan is khudaye fouj ko apnay ander aesay samo leta hai jesay unkay apnay jigr tukray hoon.sou quarter mai makano ki chaatain apas mai istarnha say mili hain,agar billi aik chat par charh jaye tou baasani gali kay nukkarh walay makan ki chat par pounch jati hai.har dosri teesri mala par lagi kabootar ki chatri makeen kay shouq ka izhaar e zouq hai.yahan ki galiyaan kafi patli patli hain par bhala ho us maidaan ka jahan thandi thandi hawa ghutan ka ehsaas khatam kardeti hai.aksar bijli janay ki suraat mai bachay is maidan mai pakrhan pakrhai ya phir kho kho kheltay hain.saath saath dil hi dil mai kabhi bijli na anay ki dua bhi kartay jatay hain.magar unki is masoom dua ko ziada tar sharf e qabooliyaat hasil nahi hota.bijli aanay ki surat mai aik zor daar shour machta hai,jis kay baad saray bachay apnay apnay gharoon ki taraf rawan dawan hojatay hain.

khair yeh tou raha sou quarter ka kabhi na ruknay wala tarz e zindagi.jismai jaazbiyat, sukoon, masoomiyat ka unsar numaya hai.nanhi nanhi khuwahishain dil ko tar o taza kiye rakhti hain.wesay tou muhallay mai bohat saray bachay thay magar un mai aik kashif naam ka bhi bacha tha jo diknay mai bhala maloom hota par tabyaatan thora simta simta sa.uski kul kayenaat gali say maidan tak muheet thi.maidan kay dono etraf footbaal kay goal banay thay agarchay ismai goal wala net ghayab tha.bus yun samjheye jesay khamba numa koi cheez gharhi hai.aik taraf bhens ka barha,saath hi chota sa pani ka hous,jahan bhensay pyaas bujhaya karein.dikhnay kay wastay kachra kundi bani thi magar ziada tar kachra bahir hi parha rehta.kharboozay kay parhay chilkay bakriyaan charteen,band thailiyoon pai billiyaan lartin,gali sarhi chanpoon ki hadiyaan kuttay uthaye phirtay,aam ki ghutliyoon par makhiyaan basera kiye rehti.dopehr mai taiz mitti wali hawa ka raqs,shaam main cricket kay shouqeen gaind balla uthaye dhamachowkri mai masroof e amal hojatay.ganji gaind or lakri ka phatta hi yahan kay mutwasit tabkay kay bachoon ka cricket khel tha.kabhi koi gali kay konay pay waterball tou kabhi koi kalay cholay baalti mai baichnay beth jata.atfaal baray shouq say chaar charanay mai zabaan kay chatkharay khareedtay phirtay.kashif subha mai school,dopehr mai siparah,shaam mai tution kay jambhailoo mai para rehta.jesay hi koi fursahat ka lamha maiesaar aata woh seedha khalu ki dukan par pounch jata or apni maan pasand patang ka bhao lagata.

khalu ki dukaan reel dhaga,chamkeeli bail,kaaj button,deegar silaye karhaye ka samaan,bacho ki toffiyan,soonf supari say laba lab bhari thi.aik konay mai unho nai patangayin,saddi maanjha,layee wali chaipi ka saman rakha hua tha.dukaan mai shutter kay bajaye aam sa dou patth wala darwaza nasb tha.jis kay darmiyaan mai bani jheeri say shararti bachay us waqt jhanktay jab khalu ki dukaan quful zada hoti.kashif jabh bhi khalu ki dukaan ka rukh karta us ki nazar dukaan pay lagay tasheeri board par parti jis mai “Asli pari ka dhaaga” uthaye aik pari asmaan ki taraf urhaan bharay jati.bazahir yeh aik haath say rung o roghan kia hua aam sa board tha par najanay kiun woh muskurati hue rooh parwar pari kashif ko bohat haseen o jameel maloom lagti thi.uska dil chahta kay woh bhi uskay saath asmaano ki sair karay,pari apnay hathoon say mazay mazay ki khatt meeth toffiyan,chiggum,jublee khilaye.pari kay nain naqsh abdur rahman Chughtai ki miniature paitings say bai panha mushabaihat rakhtay thay.pehli pehli kajal say labraiz ankhain,gudaaz gudaaz haath,pakeeza eriyaan,saaf shafaf pur noor pindliyaan kashif ko apnay sehr mai jakkarh letin.pari laal rung kay libaas mai malboos sharmeeli uroosa ka roop dharay shaan baan say jalwa afrooz thi.kashif ka dil chahta woh is pari ko aik lamhay kay liye apni bahoon mai bharlay or khoob ro ro kar ussay apni mohabbat ki sachaye ka yaqeen dila dai.aksar shaam kay waqt woh footbaal kay khambay numa goal pay charh kar beth jata, phir maghrib ki azaan honay tak asli pari kay dhagay walay board par nazrain jamaye ankhoon hi ankhoon mai raaz o niyaaz ki batien kia karta.jab kabhi kashif ko mehssos hota aik lamhay kay liye pari muskuraye thi ya usnay salam ka jawab dia hai tou us din kashif ki Eid hoti or woh khushi say phoolay nai samata.

kashif kay kuch shararti dost aksar ghulail say us pari walay board ka nishana letay magar woh tamam pathar pari kay bajaye kashif kay dil pay barastay thay.woh unhay mana karta,unsay khafa hota unki ghulailain tor deta or dil hi dil mai pari say mua’afi mangta.mohabbat mai sung baari hi sachay ashiqoon ka husool hai soch kar apna aap mutmaeen kar leta.aksar auqat board say jharhnay wala zung alood hissa woh kisi tabarruk kay towr pay barhay sambhaal sambhaal kay rakhta.phir waqt bai waqt in maienay khaiz zarroon ko bosa dainay mai mashghool dikhaye dai.mousami barishoon ka aghaz ho chuka tha.din ba din board sawan ki jharhi ki waja say khasta halat mai jata hua nazar araha.kayen hisson say pari ka wajood taqreeban mit ta ja raha tha.is sitam zareefi pay kashif ka dil khoon kay ansoo bahye jata.aik raat garaj chamak kay saath taiz tufani meen barsa.yahan kashif apnay bistar mai khuda say pari walay board ki salamti ki duain karta raha.karb ki halat mai raat bhar karwatain badalta raha or shadeed iztairab ki waja say taiz bukhar ka shikar hogaya.subah kay namodaar hotay hi pehlay lamhay woh barish kay aab say bhari gali mai rasta bananay ki khatir lagi eentoo pay phalangta hua khalu ki dukan par pouncha tou aik qayamat khaiz manzar iska muntazeer tha.kia dekhta hai hai kay pari wala board zameen pay gira parha hai,raat bhar parhnay wali barish ki waja say ab wahan pari ka naam o nishan tak moujood nahi tha.usnay aik nazar aasman par utha kar dali or kanptay hontoon say khuda ki is maslaihat par bashri ehtaijaj kia.bai basi kay aalam mai usnay phoot phoot kay rona shuru kardia,ankhoon say moti kay manind ansoo’on ki larhi jari o sari thi.kashif nay laraztay hatoon say borad ko zameen pay say uthaya or anan fanan chaati say laga lia.agarchay board say risnay wala rung uskay wajood par lag chuka tha magar kashif ki duniya bai rangeen ho chuki thi.khair waqt guzarta gaya ab asli pari kay dhagay ki jaga wahan tasheer ki khatir aik gym walay nay tan saaz [body builder] ka board laga dia.us board ka kashif khud apni ghulail say nishana leta tha.

wasi shah kehtay hain :

“mohabbat kay hazaaro’n rang laakhon istra’aarey hein,kisi bhi rang mai ho yeh mujhey apna banati hai yeh mere dil ko bhaati hai…….”

Author :zubair siddiq

#Urdu Haiku

bad qismati ka yeh aalam hai rafeeqoon
jab dil say solar panel  nasb kia hum nay
aftaab zahoor pazeeri ki ada bhool gaya

Haiku by : Zubair Siddiq

jadeed couplets

couplet #1 “paigham”

unkay 1 new message ki khushi main
teetliyaan si pait mai gudgudaati hain

couplet #2 “tasweer”

email mai apni shokh tasweer bhaiji hai
goya hamain hamaari taqdeer bhaiji hai

couplet #3 “dikhawa”

pakwaan jesa bhi ho,fatafat isay instagram kartay hain
sada ghiza ka bhi,man o salwa sa ehtaram kartay hain

couplet #4 “samaa’n”

keyboard say jo kardiye hum nay albelay isharay
zindagi ki khirkhi mai umad aye dilawaiz nazaray

couplet #5 “muskaan”

dil mai hai yehi muraad kay sanam ko lol kardun
mai kuch is ada say tabbassum ko anmol kardun

couplet #6 “ulfat”

safar ki takleef mai bhi unhay text ho raha hai
araam say jo laitay hain apnay shabista’n mai

couplet #7 “bai rukhi”

qat’a e guftugu ka acha tareeqa daryaaft kia hai
khali muskurahat ka alaamti nishan bhejtay hain

couplet #8 “koft”

uljhay hain aik integration kay sawal mai
kuch lamho kay liye zeest wabal lagti hai

couplet #9 “wisaal”

un kay ru ba ru hum kalami mai
pizzay ki lazzat bhi bai zaiqa hai

couplet #10 “mua’lim”

karobaar e hayat  kia kar sikhaaye hamain koi
hum apni zaat kay kaye pehloun mai mba hain

couplet #11 “samar”

kuch tou is shoq e awargi ka nateeja nikalna tha
bus miyaan CV apni kharaab karay bethain hain

couplet #12 ” na ehl “

naz hai jinhay apnay engineer honay par
aala e zindagi marammat kar nahi saktay

couplet #13 “taqleed”

dawaye kay naam say ghabrati thi jo haseena
aaj doctor ban rahi hai faqt maa baap ki khatir

couplet #14 “dil badama”

dil lagi ki kia baat karen jana’a say
unki Awww hamari jaan lai leti hai

couplet #15 “sung dil”

itnay marasim kay ba wajood aik sitam kar gaya
woh mujhay kitni bai dardi say unfollow kar gaya

couplets by : Zubair Siddiq

principal forms of urdu poetry

there are six type  “principal forms of  urdu poetry”

[Ghazal]  is a set of two liner couplets,which strictly should end with the same rhyme and should be within one of the predefined meters of Ghazals.There has to be minimum of five couplets to form a Ghazal.Couplets may or may not have same thought.It is one of the most difficult forms of poetry as there are many strict parameters that one needs to abide by while writing ghazal.

[qasida]  a kind of ode,often panegyric on a benefactor,sometimes a satire,sometimes a poem dealing with an important event. As a rule it is longer than ghazal,but it follows the same system of rhyme.

[Marsiya]  is nearly always on the death of  Hasan and Hussain and their families,but occasionally on the death of relatives and friends.It is usually in six-lined stanzas with the rhyme aaaabb. The recitation of these elegies in the first ten days of  Muharram is one of the greatest event in Muslim life. A fully developed marsiya is always an epic.The famous marsia writers who inherited the tradition of Mir Anis among his successive generations are Mir Nawab Ali ‘Munis’, Dulaha Sahab ‘Uruj’, Mustafa Meerza urf Piyare Sahab ‘Rasheed’, Syed Muhammad Mirza Uns, Ali Nawab ‘Qadeem’,Syed Sajjad Hussain “Shadeed” Lucknavi, Allama,Dr.Syed Ali Imam Zaidi,”Gauher” Luckhnavi the(great grandson of Mir Babber Ali Anis).

[Masnavi]  in the majority of cases a poetic romance. It may extend to several thousand lines, but generally is much shorter. A few masnavis deal with ordinary domestic and other occurrences. Mir and sauda wrote some of this kind. They are always in heroic couplets, and the common metre is bacchic tetrameterwith an iambus for last foot. The Religious masnavi Histori of Islam (Tarikh-e-Islam Az Quran) written by Dr.Syed Ali Imam Zaidi Gauher Lucknavi.

[Tazkira]  biographical anthology,almost always of  poetry alone.This is often a mere collection of names with a line or two of information about each poet, followed by specimen of his composition. On the other hand it may be the history of urdupoetry with copious illustrative extracts.The best tazkiras give biographical details, but fail in literary criticism,and we get little idea of style or poetical power, still less of contents of poems.Even the large anthologies do not systematically review an author’s work. Most of them have the names in alphabetical order,but one or two prefer historical order.The majority quote only lyrics, and the quotations,usually chosen at random,do not illustrate poetry.

[Nazm]  Urdu nazm is a major part of Urdu poetry.From Nazeer Akarabadi, Iqbal,Josh, Firaq,Akhtarul Iman to down the line Noon Meem Rashid, Faiz, Ali Sardar Jafri and Kaifi Azmi.They have covered common life,philosophical thinking, national issues and the precarious predecament of individual human being.As a distinct form of nazm many urdu poets influenced by English and other European poets took to writing sonnets in Urdu language.Azmatullah Khan (1887-1923) is believed to have introduced this format to Urdu Literature.The other renowned Urdu poets who wrote sonnets were Akhtar Junagarhi, Akhtar Sheerani, Noon Meem Rashid, Mehr laal soni zia fatehabadi, Salaam machh ali shahari and wazir Agha.

principal understanding made by : Zubair Siddiq

kisi say mujhay kabhi aesi mohabbat bhi ho

http://soundcloud.com/timeurdu/kisi-say-mujhay-kabhi-aesi

tanhai kay kisi lamhay
bai hungum sochoon kay darmiyaan
aksar mujhay
aik achota sa khayal aata hai
kisi say mujhay kabhi aesi mohabbat bhi ho

jo uskay ehsas say ho
jo uskay nazriyaat say ho
jo uskay shikasta khaboon say ho
jo uskay namkeen ankh kay pani say ho
jo uskay mathay pay parhi shikan say say ho

us mohabbat mai shiddat ho
us mohabbat mai sard mohri ho
awara sitaray ki tarnha say
woh idher udher bhatakti ho
jaam ki tarnha chalkti ho
us mai aik baankpan ho
woh albeli ho
woh mohabbat nadeedi ho
phir kabhi sochta hun woh mohabbat hi na ho
phir dil kehta hai woh ho
bus pata nahi ho kay woh kia ho

woh mohabbat jism kay mehraab say na ho
narm o nazuk hontoon say na ho
siyaan nagan zulfoon say naho
makhroota ungliyoon say na ho
surahi daar gardan sa na ho
ghazali ankhoon say na ho
sawali sansoon say na ho

woh mohabbat uski fazool batoon say ho
woh mohabbat uski banwti hansi say ho
woh mohabbat uski sazishi soch say ho
woh mohabbat uski bai rukhi say ho

woh mohabbat mujh say
amar bail ki tarnha chimat jaye
chowkat mai lagi deemak ki tarnha
mujhay khokhla karday
meri zaat mai bai parnha nuqs numaya karday
mai banjar hojaoon aesi mohabbat ho
jadu tonay ki suyeyoon ki tarnha say
meray jigr mai chuban ka ehsas ho
nook daar churi say jesay
saib ki phank ko tarash dia ho
aesi ajeeb mohabbat ho

us mohabbat mai maghrib ki si khamooshi ho
us mohabbat mai bazaroon ka sa shor ho
woh dikhnay mai ainay ki tarnha shafaf ho
choonay par koyailay ki tarna siyaah

zung alood lohay kay tukray ki tarnha 
haqeer si ho
phir bhi apna aik wazn rakhti ho
deewar pay lagay makri kay jalay ki tarnha 
bai mainay si ho
phir bhi aik zindagi rakhti ho

us mohabbat ka zaiqa
naram garam shakar qandi sa ho
lazat shami kabab ki tarnha lazeez ho
woh kataroon ki tarna chatkharay daar ho
jalebiyoon ki tarnha shireen ho

us mohabbat kay apnay mousam hooon
us mohabbat kay apnay rung hoon
woh mohabbat aesi ho
jesay

garmi mai nungay paoon chalnay say chalay
sardi mai khunk hawa say kapkapahat
bahar mai phooloon ki meethi gudguddi
khiza mai zard pattoon ki siskiyaan

woh mohabbat
naye jotay ki tarnha katay mujhay
tabarruk ki tarnha batay mujhay
pardhay ki aarh mai chup kar
aah bhari nazroon say dekhain mujhay
mera samna karay anjanay khoof ki tarnha

woh mohabbat
mujhay bai parnha aziz ho
mai usay apnay gird o nawah say
chupa chupa kar rakhoon
raat kay kisi pehr jab sab so jayen
band muthiyaan khol kar
ik nazr dekhoon ussay
muskuratay laboon kay saath
woh mera istaqbal karay
hum apnay dard kay qissay sunain
apni baiwaqoofiyoon par hansain
apni sharartoon par khilkhilaain

mujhay us mohabbat ki judai kay khayal say
khoob runj ho
aik ansoo bai ikhtiyaar rukhsaroon tak aaye
bai mainay si ghabrahat dil ko sataye
andaishay or waswasay zehn ko thap thapaye
kahin aesa na ho
or
kahin wesa na hojaye

woh mohabbat musladhar barish ki tarnha
meray andar kay sehra ko jal thal karday

woh mohabbat bikhri hue khushbu ki tarnha
meray libaas ko muattar karday

woh mohabbat chup kay say meray kaan mai
sargooshiyaan karay

mujhay us mohabbat say
kuch aesi rafaqat ho
us mohabbat ko mujh say
kuch aesi nisbat ho
agar jism ki hasiyaat rakhta hun mai
woh mohabbat mera saya ho

woh mohabbat kuch istarnha say ho
koray kaghaz pay likhay
chund khoobsurat alfaaz jesay
kisi shayair ka khawab ho
kisi adeeb ka sarmaya ho

Poet and recite by : Zubair Siddiq

UNDERSTAND URDU GHAZAL TERMINOLOGIES IN BETTER WAY

[Ghazal] is a set of two liner couplets, which strictly should end with the same rhyme and should be within one of the predefined meters of Ghazals. There has to be minimum of five couplets to form a Ghazal. Couplets may or may not have same thought. It is one of the most difficult forms of poetry as there are many strict parameters that one needs to abide by while writing Ghazal.

[Misra] one line of a couplet or verse.

[Matla]  (Arabic: مطلع) is the first sher, or couplet, of a ghazal, a collection of poems in Urdu or Persian poetry. It is possible, although extremely rare, for there to be more than onematla in a ghazal; in this case the second is referred to as matla-e-sani, literally the second matla. It is important part because it establishes the overall form and mood of the entire ghazal.

[Beher] in urdu poetry is the meter of sher (a form of poetry in Urdu, essentially a couplet). It can be considered as the length of the sher. Both the lines in the sher, The couplet must be of same beher. And all the shers in one ghazal (a poetic form consisting of couplets which share a rhyme and a refrain) must be of the same beher. There are 19  kinds of beher. However, generally beher is categorized in three classes: Short, medium and long depending upon the length of the misra (first line of the sher)[Qaafiyaa] is a device employed in a form of  poetry known as ghazal (a poetic form consisting of couplets which share a rhyme and a refrain). The Qaafiyaa is the rhyming pattern of words that must directly proceed the Ghazal’s radif.

[Radif]  (Arabic: رديف) is a rule in Persian, Turkic,and urdu poetry which states that, in the form of poetry known as a ghazal the second line of all the couplets (bayts or sher) must end with the same words. This repeating of common words is the “Radif” of the Ghazal. It is proceeded by a Qaafiyaa which is a repeating pattern of words.[Maqta]  is the last sher (couplet) of a ghazal, A collection of  Urdu poems, in which the poet’s takhallus, or pen name is employed often in very creative ways.[Takhallus] is derived from Arabic, meaning “ending”. This is because in the  ghazal form the poet would usually incorporate his or her pen name into the final couplet (maqta) of each poem.

Understanding made by : Zubair Siddiq

HASEEN AIK SUBHA OR DILRUBA MANZAR

Haseen aik subha
Jab halka halka mee’n barasta tha
Dil mai khayal aaya
Kiun na is makaan say bahir niklain
Dilruba manzar pukarta hai
Panchiyoon ki aawazain aati hain
Roshni ki umeed phoot thi hai
Rastay qaleen ban jatay hain
Musafir humsafar ban jatay hain

Urhtay hariyal towtay ki tain tain
Aik naqaab poshida doshiza
Jis ki nigahain najanay kitnay lamho’n say
Ta’auqub kar rahi thi mera
Qareeb hi kachray ka aik dher
Boonda baandi say sarrh raha tha
Us mai uthti na khushgawaar bu 
Mua’ttar fizzah ko cheer rahi thi

Kuch neend say ungtay masoom bachay
Taangay ilm ka bojh kaandho pay
Bojhal qadmoo’n say aagay barh rahay thay
Kitnay khuwab sajaye ik nujawan 
Chalay ja raha tha apni dhun mai
Haath philaye aik maaye
Muflasi ki surat banaye
Taqaza chund sikko ka kar rahi thi

Dhuwaan aik janib say uth raha tha
Insaan apnay pait ki bhook ka saman kar raha tha
Kuch mazdoor muskaratay chehroon say
Haath mai thamay chai ki pyali
Hairan ankho say istaqbal kar rahay thay
Kuch qadam agay ki taraf  
Kuch qadam peechay hat rahay thay
Har nazar soch ka mehwar thi
Aur har soch nazar ki parastar

kaanoo’n mai sargoshiyaan karti 
College ki kuch larhkiyaan
Chund baankay chabeelay
rumaal ghumatay larhkay
Keechar urhati garhiyaan
Apas mai larhti biliyaan
Jaan say gayee ik khasta haal cheel
Woh sabzay say mehroom darakht
Hansti huye haryali
Bheegi bheegi si ik kiyaari
Phisalti phisalti si aik footpath

Taiz qadmoo ki chaap har dafa
Kiun mujhay chownka deti thi
Mai kuch dair ko tehr sa jata tha
Woh qadam kuch dair saath chaltay
Thori si qurbat muasar aati thi
Hum phir say ajnabi ban jatay thay
Khushbu hawa mai raqs karti 
Hawa khushbu mai gum
Barha suhana manzar tha

Kaasni rung ki woh aik dilruba subha
Hamesha yaad mujh ko rahay gi
Har pal mujh ko yehi kahay gi
Acha hua tum us din bahir nikal aaye
Tum say mulaqaat karna acha laga 
Bezaar band kamroo mai na raha karo
Khaali kursi pay baith kay aanso na bahaoo
Azad panchi ki tarnha ghoomo
Befikr phool ki tarnha khilo
Woh haseen aik subha
Jab halka halka mee’n barasta tha

Poet : Zubair Siddiq

ADHOORAY KHAWAB

kabhi hum kitnay nadan hua kartay thay
duniya ko badalnay kay khawab dekha kartay thay
badaltay waqt nay kia kuch nahi badal diya
hamain or hamaray khawaboon ko bhi
bikhray bikhray say kuch jazbaat hain ab tou
kuch un dekhay say khadshat hain ab tou

 

koi kishti paar nahi lagti
thandi hawa ab bahar nahi lagti
lutf kay pehlu na janay kahan gum hogaye
woh jo kabhi saath hanstay thay hum yaar
aaj sab apni apni zindagi mai magan hogaye

 

hazaroon sawal diary ki nazar kardiye
lakhoon jawab dil mai hi paiwasta hain
hairangiyaan hain kab say gumshuda
talash e ishq kab say hai rawan dawan
mazeeed bojh uthanay ki sakat na rahi
khamoosh kadmoon ki ahat na rahi
neend na rahi karwat na rahi

 

iztairaab ki si kafiyat hai char su
aazmaish ki uljhanay hain ru ba ru
zaat ki gumrahi mai hai wajood ki justuju
chup hontoon pay hai koi manoos si guftugu
manzil ka nishan lagta hai kuch dar nagu

 

dilasaay lagtay hain ab bachkana
barhti umar nay dikha diya pukhtagi ka thikana
zameen pay nazrain rakhay kuch munfarid sochna
khoye huye khayal mai halkay halkay baloon ko sehlana

 

yun bhi bhala zindagi mai baicheniyaan thi kabhi
yun bhi bhala hum itnay majboor thay kabhi
yun bhi bhala baizariyaat kay shikar thay kabhi
yun bhi bhala tanhai kay wafa daar thay kabhi
yun bhi bhala,yun bhi bhala

 

in hanstay muskuratay laboon par hasad kahan say agaya
mohabbat or chahat kay beech maqsad kahan say agaya
doolat ki khushbu mai wajd kahan say agaya
husn e ikhlaq kay udhar mai yeh nagad kahan say agaya
qurbat ki safeeri mai yeh dooriyoon ka wafd kahan say agaya 

 

kia dhoondh payen gai woh shakhs jo hum khud hua kartay thay
kia phir say ankhain wohi suhanay sapnay bundain gi
kia phir say subha pareendo ka chehchana acha laga karay ga
kia phir say barish kay maqnateesi qatray dil ko bhayain gai
kia phir say hamari aghoosh mai gulab khilan gai
kia phir say hum jeena seekhain gai
kia phir say?

Poet : Zubair Siddiq